Eko në Tiranë për banorët e Bulqizës

Admin Anëtarësuar : 07 Dec 2007 Mesazhe : 30

[b]Eko në Tiranë për banorët e Bulqizës[/b]

Nga Sidrit Bulqiza

Presidentja e fondacionit “Fëmijët shqiptarë”, Liri Berisha, ka premtuar një eko në emër të fondacionit të saj për fëmijët e Bulqizës, e cila në të vërtetë nuk iu është dhuruar atyre. Emisioni investigativ “Fiks fare” dëshmoi dje se zonja Berisha ka spekuluar publikisht, duke prezantuar një aparat eko-je për dhuratë, i cili, në të vërtetë, nuk gjendet në Bulqizë, por në Tiranë. Gazetarët e emisionit “Fiks fare” kanë intervistuar kryetarin e bashkisë, i cili ka pranuar se nuk ka mjek të specializuar për eko në spitalin e Bulqizës, si dhe drejtorin e spitalit, Fatos Hoxha, i cili pranon se eko-ja gjendet në Tiranë. Skandali ka nervozuar pacientët e spitalit dhe banorë të Bulqizës që e kanë marrë seriozisht gjestin bamirës, duke shkuar të vizitohen në spital. Siç është bërë e njohur në datën 2 maj 2008, zonja Berisha, si kryetare e fondacionit “Fëmijët shqiptarë” i dhuroi spitalit të Bulqizës një aparaturë eko-je. Mirëpo, siç dëshmoi dje investigimi i gazetarit të “Fiks Fare”, eko-ja ishte e maternitetit të Tiranës dhe u la vetëm 3 orë në Bulqizë, sapo mbaruan vizitat falas që kryen mjekët që erdhën nga Tirana. Vetë drejtuesit lokalë të shëndetësisë në Bulqizë dëshmuan se aparatura që treguan gjatë ceremonisë ishte sa për demonstrim. Eko-ja e vërtetë është në Tiranë dhe nuk ka lëvizur asnjëherë që atje. Sipas tyre, pritet që dy mjekë të Bulqizës të specializohen për ta përdorur këtë aparaturë. Ndërkohë, fondacioni i drejtuar nga zonja Berisha i dhuroi po spitalit të Bulqizës disa pako me ndihma, të cilat, siç dëshmonte kamera e emisionit, shpërndaheshin me furgonin e policisë. Të gjitha këto detaje dëshmojnë se, më shumë sesa për Bulqizën, zonja Berisha është angazhuar në një fushatë imazhi qeveritar, e cila me gafa të tilla rrezikon ta dëmtojë më shumë qeverinë. Disa javë më parë, zonja Berisha ka dhënë një intervistë rreth tragjedisë së Gërdecit, ku shpjegonte se burri i motrës së saj punonte si punëtor ngarkim-shkarkimi në Gërdec dhe se zoti Berisha nuk dinte gjë për këtë. Intervista shkaktoi reagime të ashpra kundër saj dhe zotit Berisha. Shtypi akuzoi djalin e kryeministrit, Shkëlzen Berisha, si të lidhur me biznesin e Gërdecit dhe si punësues të kuantit të zonjës Berisha. Fondacioni “Fëmijët shqiptarë” është bërë i njohur vitet e fundit, për shkak të projekteve të tij për të ndihmuar fëmijët talasemikë. Ai shpesh i siguron fondet përmes ballove bamirëse ose kontributit të biznesmenëve shqiptarë.